سمايليز - الجزء النص بعد الأول

بعد ما نزل علي الالهام والوحي وكتبت الجزء الأول من سمايليز وكفتوا التعليقات عليه ( شي سبعو تلاتين مليون تعليق .. بس حذفناهن كلن لأسباب انبطاحية ما خرج نوردها بهلزاوية هي ) ما عاد فيني عدل بالعنوان
عم اقرا العنوان وانا مستغرب من حالي
انه شو هي الجزء الأول ؟ يعني معقول في جزء تاني ؟ ههههه اكيد في جزء تاني
لو مافي جزء تاني ما كان في بالاصل جزء أول
وانا عم فكر بالأول والتاني شعل جنب راسي لمبة بالاول حسيت حالي بأفلام كرتون وانه هيك أجاني التلفون السماوي ..
تذكرت شغلة دائما بتعن على بالي .. مو دائما دائما يعني مشان الحلال والحرام عانة مرتين تلاتة مو اكتر .. ليش منقول " اللغة العربية الفصحى " وما منقول " الفصيحة "
ما نحن ما عنا غير لغة عربية واحدة فصيحة .. من وين اجوا بقيت الفصيحات وليش لهلق ما تفصحنت شي وحدة وعرفت على نفسها بأنها اللغة العربية الأقل فصحنة من هديك ؟ ووينن بقية اللغات اللي عم تتفصحن الضرسانة الفصحى علين ؟

نرجع للجزء تبع الأول والتاني
يمكن كل اللي عم يقروا السطور هي مفكرين اني عم دور على مادة للنشر .. او اني حابب اتهضمن ونكّت شوي !
مع العلم انه فكرة تأليف شغلة هيك للهوا وتسميتها "الجزء الأول" مانها بدعة انا عاملها أو شي انا اول مين اخترعه
ليكه فلم saw الجزء السادس منه صار بالسوق عم ينباع ع البسطات بـ 25 ليرة سورية .. ما حدا خطرله يسال حاله انه اللي ألف الجزء الأول كان حاطط براسه يعمل جزء سادس من الفيلم ؟ بـ شو بيفرق كاتب فيلم الـ saw عني ؟ اني زلمة مغمور بهلدنيا ما معروف قرعة بابا فين - اعلان مدفوع : بابا هون بالصالون عم ياكل .. علكة سهام - مثال تاني لأكدلك ازدواجية معاييركن
النسخة الأخيرة من كتاب الخيميائي لباولو كايلو كاتب فيها انه الكاتب " يعني باولوا " انه كان قاعد هيك عم يصفن بالسما نط براسه اسم .. سنتياغو .. حس انه من ورا هلأسم رواية كبيرة وقصة خطيرة .. وبلش يألف روايته
بحياة السما والأرض معقول عم تصدقوا هلحكي ؟ انه نط اسم براسه ومشي وراه ؟
يعني اللي بصدق هيك بلفة واللي بتمشي عليه هيك خرطة وكذبة معقول رح يكذبني وقت عم ئول اني وئت كتبت " الجزء الأول " كانت مجرد هفوة او سهوة او بالاصل مافي جزء تاني بس شبعرفني ليش هيك كتبت !!
وهلمشكلة هي ( الازدواجية بأخد المواقف من الحالات ) بتمر بحياتنا كل يوم
يعني مانها مجرد تفرقة بيني وبين باولو كويلو او بيني وبين كاتب فيلم دموي متل saw القصة بتصير بحياتنا كل يوم
اذا مشيت بنت مع شب غني وحلو وئلها " بتحبي اعزمك على كازوزة ام الخمسة "
رح تبقى البنت الليل كله عم تهلوس وتحكي مع حالها .. يااااااااااااي عفوي ومهضوم مو معقول قديش متواضع وقريب علقلب .. اطيب كازوزة شربتا بحياتي مع انها كانت بلا شرمونة !! ... بجنن هلشب بجنن ناقصه حصان ابيض بس
واذا نفس البنت .. الله وكيلكن نفسا .. عم تمشي مع شب بتعرف انه اوضاعه على قد حالها وعزمها نفس العزيمة وياسيدي عزيمة احسن .. اذا عزما على كازوزة ام العشرة تبع اوغاريت .. رح تبقى عم تسب على بخله سنة ! يعدمني ياه 20 ليرة حق بيبسي ما سخي يدفع كيف رح اقدر عيش مع هيك واحد استغلالي ما بيعرف يبسط حاله بالدنيا وبيحسب القرش مية مرة قبل ما يدفعه !!

بالأخير ماني متأكد من حالي .. انه ممكن يكون في سمايليز الجزء التاني ما حدا بيعرف .. بكل الاحوال رح تتخبروا ع الموضوع في حال حدوثه
لمزيد من التفاصيل زوروا موقعنا على الانترنت
قومي طلعي علباب دوت بلوغ سبوت دوت كوم ( مسبوقاً بـ اتش تي تي بي نقطتين فوق بعض وبعدن شخطين بيجي بعدن دغري دغري يعني بلا فواصل وبلا شي : دبليو دبليو دبليو دوت )
جنة الأطفال بيوتهم
الدين ممنوع والعتب مرفوع وعلى الله الشفاء على الله