سمايليز - الجزء الأول

التواصل الالكتروني بكون فاقد لجزء كبير من التفاصيل اللي ممكن انك تعبر عنها فايس تو فايس
نبرة الصوت وتعابير الوجه طريقة الضحك - باستهزاء أو بانفراط من الضحك .. لحقوا لمّوه - وبقية الطرق التعبيرية الحسية اللي ما منقدر نعبر عنها الكترونيا

يعني .. برضاي عليكي
هلق انتي عم تعرفي اذا انا عم احكي عنجد او عم اتريّق عليكي ؟
اكيد لا
اذا بدنا نشوف الواقع بهلطريقة رح نطلع بفكرة انه السمايليز فكرة رهيبة
انه ممكن بسمايل واحد خفيف نضيف ابن عالم وناس توصل تعابيرك او تعابير الشخصاية اللي عم تحكي معها
يعني اذا وحدة عم تخبرك شي معلومة او عم تخرط عليكي شي خرطة سماوية
او انه حدا مفززلك عصبك
ممكن يكون جوابك: كيف ؟
هلكيف بتصلح لكل الحالات فوق بمجرد انك تلزقي وراها سمايل مناسب وخلصت القصة


من جهة تانية
يا متخلفة يارجعية يا مستهلكة للتطور التقني يا اللي فرغتي الثورة الصناعية من محتواها وضيعتي تضحيات الملايين مشان يحققوا هلثورة يااللي ما بتخافي الله 
لك ما عم يطلع معي السبة اللي بتزبط معكن انتوا يا جماعة السمايليز
يلعن سماكي .. كفرتيني
انه هاد المحروس الأصفر شغلته يضحك
لك اسمه سمايل يعني ضحااااااااااك
من وين عم تنكشو سمايل عم يبكي
او سمايل نايم
ايا سمّيه "كراي"  او سليب ( توضيح : سليب مالها علاقة بالتياب الداخلية مشان اصحاب الفكر الانبطاحي ) خلصت القصة انه ضروري تعمليلي من الحبة ئبة
لا بحياة ربك ما بتمشي على هلفكرة وبتمرقي مرور الكرام .. لسع ما خلصت
انا يبّست راسي وبدي اعرف
كيف زبط معك انه سمايلي عم يبكي او سمايل عم ينطح الحيط او اسمايل عم يئوس التاني او عم يليحه كف
بشرفك خبريني انه كيف زبط .. يا الله لأشوف تفضلي .. ما تتفضلي ؟
غيرها .. يعني غير هلفوتة بالحيط تبع سمايلي عم يبكي
بزكاتك جاوبيني على هلسؤال هاد اسمك عم تتعذبي وتتعذبي
انه ضروري تتهضمني هلق علي ؟ انا زلمة طفران من البشر ومن تفاصيل البشر ، قاعد ورا كومبيوتري عم طقطق على هلكيبورد وع فكرة انا وقتي من دهب يعني كتير غالي علي
حضرتك بتلحشيلي مليون سمايل بالصفحة وكل سمايل بده قرن ليفتح على خطوط الدايل آب
انه يستر على اخوكي هاتي ايدك لبوسا .. خلصيني من هلقصة
لا بقى تستعملي هلسمايل العم يبكي ( هاد تحديداً كتير بيستفزني )
يا اختي اكتبيها كتابة .. ضرورية تعمليها صورة .. عبري يا اختي كتابيا عبري ما حدا عم يمنعك بس انه اعرفي حدودك
عم تكتبي نص بطول السنديانة وقفت معك على سطرين ( انا رافع حواجبي - أنا زعلت - انا عم اضحك هلق - لوك لوك لوك انا عم كه كه ضحكأ - انا قالبة خلقتي - انا رافعتلك اصبعتي الوسطى - انا عم ليحك كف ) اختي عبري عبري لا تخلي الشاشة توقف بطريقك
روحي القلب داعيلك بس انه ارحمينا شوي من السمايليز تبعك
شوي  .. بس شوي .. بكفي شوي



ملاحظة : صيغة المؤنث في النص السابق لتفعيل فكرة المساواة بين الجنسين ولأسباب انبطاحية أخرى