الخميس، 24 تشرين الثاني، 2011

منرسم باب لبكرة احلى







براين مكارتني .. اكيد ما سمعت فيه .. لانو انا كمان اليوم كانت اول مرة اسمع فيه. المهم ، براين مكارتني هوي زلمة حس انو رأي الاطفال بالحروب و الاوضاع الاجتماعية غالبا ما حدا بياخدو بالحسبان مع انو بيشكلو نسبة منيحة من السكان.
يمكن مش لانو الاطفال ما بيحسو على اي شي حواليهم. لا. و انما لانو الاطفال تعبيرهم عن واقعهم بيكون اقل وضوح (او يمكن اكتر وضوح) لادانينا اللي تعودت عالحكي الكتير و المصطلحات الخرندعية.
لهيك .. نزل براين مكارتني عالقدس و طلب من اطفال انهم يرسمو .. 
يرسمو اي شي بيطلع عبالهم .. يرسمو ايامهم، او شي موقف عشوائي بينقوه ليترجموه لرسمة.

طبعا الرسمة .. او الصورة  ممكن تحكي مية كلمة و اكتر. و من هون احيانا بتزعجنا، بتخلينا نضحك .. نعصّب او حتى نبكي. بتأثر فينا بطريقة الخطابات الطويلة و المملة اكيد ما بتقدر تعملها.
لهيك .. رسمات هاي الاطفال (اللي بحالة مكارتني و الاطفال المقدسيين كان تقريبا دايما فيها دم و قتل و دبابة) مهمة جدا. و بتعكس نفسية الاولاد و شو طبيعة الشي اللي بيخطر عبالهم. يعني صبي ببلد حر و بينتمي لشعب و سعيد ، غالبا ما رح يخطر عبالو يرسم كلاشينكوف و حدا عم يموت و جدار عازل. و غالبا رح يرسم اقواس قزح .. ام و اب .. و فرح و براءة. 



عسيرة النفسية: هل تعلم انو في دكاترة نفس كتار بيخلو زباينهم يرسمو بدل ما يحكو؟


منرجع: فكرة اليوم هيي انو اذا كان عندك طفل بالعيلة - اخ اخت .. ابن .. حفيد .. حيي الله 
اطلب منو يرسم رسمة .. و بعتلنا ياها مع عمرو او عمرها و باي مدينة ساكنين 

هيك منقدر نعمل البوم صور من رسمات اطفال بامكان متعددة.. و منقدر نشوف شو رأي الاطفال بمدينتهم .. مجتمعهم و محيطهم 
و قديش ممكن رأيهم يفاجئنا .. او بالعكس ما يفاجئنا نهائيا. 

فيك تبعتلنا صورة عن رسمة اطافيلك (مع ذكر عمرهم و المدينة اللي ساكنين فيها) على هاد الايميل: hwine-nwine@live.com 
و طبعا طبعا .. فيك تنشر الخبرية بين اصحابك او تنشر عنها بمدونتك او موقعك او صفحتك او حيي الله مطرح بتديرو لنقدر نحصل على اكبر عدد من الرسمات و القصص.



اكبس هون اذا بتحب تعرف اكتر عن تجربة براين مكارتني و تشوف فيديو قصير عن شغلو ..
مصدر الصورة تاعت الولاد: من هون
اسم البوست؟ الله يخليلنا ميمو :)

الأربعاء، 16 آذار، 2011

مدون جريء جدا جزيلا


- وينك لا حس ولا خبر ؟
- مشغول .. اوقات بفكر .. اوقات بكتب .. اوقات بشارك قصصي مع رفقاتي .. بالمختصر عم عيش حياتي
- عم تفكر وتكتب ؟! هات اتحفنا شو عم تكتب
- مسكت علي الكتابة والتفكير ونسيت المشاركة مع رفقاتي ؟
- ما فهمت عليك !
- انا عم اكتب عن شغلة بس قبل ما انشرها من باب العجرفة والمتعة بشعور الطاووس حكيتلو لرفيقي عن الشغلة اللي كتبتها
- اي وشو قلك ؟
- قلي انو اخرس واسد حلقي احسنلي
- وانت شو عملت ؟
- شو يعني لازم اعمل ؟ خرست وسديت حلقي .. شوفة عينك

السبت، 15 كانون الثاني، 2011

تونس ! هـــــــا تونس ! بشرفك تونس !


ما بعرف شو ممكن احكي على تونس وكيف بدي اكتب رأي اللي بالأصل لسع ماني بانيو

المشكلة انك تعيش حادثة غير انك تراقبها او تقارنها مع حادثة مشابهة بالتاريخ لأن التفاصيل الصغيرة اللي عم تعيشها صعب تقدر تقرر هل هية حقيقية وطبيعية ام الها دلالات تانية

من ناحية الانطلاقة فكانت مشابهة جدا لأيا حدث مرتبط بالتغيير.. متل كل الحروب العالمية والثورات (تفجرت) لمواقف بسيطة نسبية مع نتائجها
مع الانتباه لوجود تقاطع كبير وتشابه كبير مع الثورة الأشهر في التاريخ ( الثورة الفرنسية ) بنقطة اسباب حدوثها واللي برجعها كتيرين لحالة الافلاس اللي عانى منو الشعب والدولة بهديك الفترة ( مع اني بفضل شوفها كسبب بديهي لانتشار الفكر التنوريري في ظل الفساد السياسي وانعدام الحريات .. الفقر مو صفة جديدة تاريخيا طول عمرو موجود بالمجتمعات وبنسب متفاوتة بس ما دائما بكون في ثورات وهلشي بيرجع لقوة الفكر التنويري وسبب انتشارو طبعا هلحكي كلو بحسب رأي الشخصي يعني من فترة كان طلاب المدارس الفرنسية عم يحتجوا على نظام التقاعد مع انو واقعن افضل بكثير من واقع الطالب السوري مثلا .. بس الأخير ما بيفتح تمو بحرف وهلشي بيرجع لفرق فعالية الثقافة التنويرية بين الطلاب السوريين والفرنسيين !  )
غياب المرجعية بلمقارنة عم يخليني ضايع بقراءة التواريخ وتسلسل الاحداث
هل هية بطيئة ومفرطة بالبطئ او سريعة ومفرطة بالسرعة ،  انو بعد حرق الشب التونسي لنفسه طلعت مظاهرة .. المظاهرة اللي بعدا كانت بعد 9 ايام ( 18 كانون التاني مظاهرة  مدينة "سيدي بوزيد"- 27 مظاهرة العاصمة )
بعصر السرعة ما بعتقد في داعي لهلفترة حتى يصل الخبر من منطقة لتانية
بهلنقطة بتخيل الحراك الشعبي بكون آني ومباشر مو بعد 10 ايام
ومن جهى تانية ما عم استوعب كيف نظام حاكم البلد لمدة اكتر من 23 سنة بيسقط خلال ثورة غير مسلحة استمرت لاقل من شهرين هيك بهلبساطة ! لك اول انقلاب بسوريا ( حسني الزعيم على شكري القوتلي ) اخد مدة 140 يوم !
 

نقطة تانية ما عم اقدر حددها هية فعالية هلحركة .. لو عايشنا ايا نوع من الثورات المشابهة لقدرنا نقيمها هل هية حقيقية 100% او مجرد حراك شعبي غير موجه وما منو فايدة ، الأيام بدها تعلمنا وتخلينا نعرف متل هلحركات الشعبية شو ممكن تخلق من بعدا فرص . بس خوفي تكون مقولة "الثورة كالقطة تأكل اطفالها " انكتبت خصيصا لهيك حالات

اكتر الافكار اللي عم تورد على راسي وانا عم تابع الاحداث بترجع لفيلم كتب نصو محمد الماغوط واخد بطولته دريد لحام
البعض بصنفو كوميدي والتاني بصنفو من باب ( النهفات ) بس هوي فعليا سياسي وبامتياز
طاغية معيّف الحارة بجشعو وطمعو ومقاسمته رزق العالم
بحراك شعبي قاده دريد لحام ( الحلاق اللي على نياتو ) بيقدروا العالم يقلعوا الطاغية الأولاني برات الحارة ويحصلوا على حريتن منو وبعينو الحلاق ( القائم وراء هلحراك ) كمرجعية وحامي بعد تقليع الطاغية وترك فراغ مكانو ( كونو رغم كل طغيانو عامل عنصر حماية للحارة من العالم الغريبة )
افراط العالم بالمغالاة بمدح الحلاق التشتوش حول الاخير لطاغية تاني مشابه تماما للطاغية الأولاني !!
الشعب بيرجع بيتحرك وبيقتنع انو فكرة الحماية ما رح يامنها هلنوع من الزعامات
فبقرر يرفع القضية لمستوى اعلى ويوصلها للحكومة حتى تلاقي حل للطغاة اللي ما حدا عرفان سبب وجودن ( مع العلم انو الشعب هوي اللي عم يصنعن )
المفاجأة كانت بانو استجابة الجهة المعنية كانت عن طريق اقامة مفخر شرطة برئاسة أحد أصحاب الثقة والكفىء للمهمة .. واللي كان هوي نفسو الطاغية الحلاق اللي صنعو الشعب !! بمعنى رجعت حليمة لعادتها القديمة بس بصيغة جديدة ! وهلشي بالنسبة الي متوقع بنسبة اكتر من 90% لواقع الشعب التونسي مستقبلاً لأنو بالاساس ما كان في تراكم وعي واحتكاك مع نماذج ديمقراطية بيتجسد معها حقيقة الحرية ( يمكن كون غلطان باعتبار شمال افريقيا ما بتحمل نسيج مشابه للشرق الأوسط ... بس ما بتخيل ظروفو مختلفة كتير عننا لهيك متوقع يكونو متلنا بهلنقطة )

المزعج ولا قلكن ليش هلديبلوماسية بلكتابة خليني كون مباشر
الجزء اللي بيبعص انو العالم الحفظانتلها بيت شعر عم تقولو علطالعة والنازلة وكأنها عم تعيد تكوين البشرية او تعيد انتاج النظرية النسبية لأول مرة بتاريخنا الحديث
مكانك راوح هاد هوي شعبنا عاطفي غوغائي ما بيعرف يقيم الموقف بموضوعية ويتعامل معو بعقلانية ليستفيد منو ويتعلم من سير الاحداث فيو
بيفرح وبينعجق وبينعبط بحالو والدنيا ما بتساعو بثانية .. وبيبكي وبيردح وبيحرد وبكسّر كلشي حواليو بثانية تانية وبكل الاحوال خلال شهر بينسى الحالة اللي كان فيها سواء كانت ردح  او فرح وبيرجع للقالب اللي عايش فيو بميزانو الاعوج الجامع فيو النق مع الاقتناع بكفّة وحدة .
ومكانك راوح لا بيتحرك خطوة لقدام او لورا ( يمكن واقف محلو والبشرية عم تمشي لهيك بتحسو ماشي لورا .. بس هوي ثابت بمحلو )
متل الأصلع الفرحان بشعر حماية جارتو ومعتبرو عز وافتخار وحق مشروع انو يتغنى بجمالها
لك اصحى على حالك وشوف صلعتك اللي عم تلمع من المريخ بعدين تعا احكيلي بجمال الشعر وروعتو

الاثنين، 6 كانون الأول، 2010

شوية ردات فعل على خبر .. كفريات وسبسبات وما شابه ذلك



اليوم فقت من الصبح وانا عم اعمل فتلتي المعتادة على مواقع النت تفشكلت بخبر فشكلي كل يومي .. وعلأغلب كل اسبوعي

الخبر بقول :
http://www.farfesh.com/Display.asp?catID=119&mainCatID=117&sID=91504
مكافأة بآلاف الدولارات.. لمن يقتل المسيحية التي اساءت الاسلام!
بعد ادانة المرأة المسيحية اسيا بيبي التي تلفظت بألفاظ تنال من الرسول محمد صلى الله عليه وسلم، وبعد ان حكمت المحكمة عليها بالاعدام، فقد اعلن رجل دين باكستاني مسلم عن مكافأة مالية تقدر بآلاف الدولارات لكل من يتجرأ على قتل تلك المرأة الباكستانية المسيحية.
وذكرت تقارير إخبارية أن مولانا يوسف قريشي إمام مسجد محبة خان في بيشاور عاصمة إقليم خيبر بختون خوا الذي يعصف به التمرد شمال غربي البلاد، أعلن عن المكافأة خلال مسيرة احتجاجية يوم الجمعة.
ونقلت صحيفة "ديلي تايمز"عن قريشي قوله: "سأقدم 500 ألف روبيه (5890 دولارا) لمن يقتل آسيا بيبي" كما دعا طالبان أيضا الى قتل المرأة، لأن في ذلك "خدمة للدين". كانت محكمة "نانكانه صاحب" الجزئية في وسط إقليم البنجاب، أدانت بيبي الشهر الماضي، بعد مرور سبعة عشر شهرا من إلقاء القبض عليها بتهمة التطاول على الدين.

وأنكرت بيبي الاتهام، قائلة إنها اتهمت زورا بعد مشادة مع مجموعة من النساء المسلمات حول وعاء ماء. غير أن المحكمة قضت بإعدامها.


ولأنو الفشكلة صعبة بهلأيام بقيت كل نهاري عم فكر بمضمون الخبر وبحالة الشخص المعني فيو
ومن جحشنتي ( اي نعم جحشنتي ) اني فتحت هلسيرة بالجامعة مع مجموعة من الشباب المتدينين
ما كان هدفي محاججة فكرية او مناطحة دينية
كان مجرد حكي عن الشي اللي مأثر فيني بهليوم
فنط ( وكلمة النط هون بتجي بمفهوم معنوي وفعلي على نمط انبرى ) شب ليحكيلي على أطفال غزة ومعاناة أهل العراق
انو وين هوي السقف للنقاش اللي ممكن يدور بين 2 طرشان

يا اخي بالنسبة الي المهزلة بالخبر والجزء الجارح جدا فيو هوي انو الفكر الاستبدادي اللي ما بيحترم حقوق العالم ولا بيعترف ألا باتجاه واحد للحقوق .. هوي الاتجاه اللي بفوت من تحتك وبيطلع من راسك ( الخازوق في حال حدا ما دارتلو ) .. بس الاتجاه التاني للحقوق اللي بيطلع من راسك من افكار وحكي ما بيعترفلك فيو وبعتبرو جريمة
المصيبة بهلطريقة البتقرف بالتعامل انو استمراريتها بتخلي الشخص ينكر حقو بكلشي.. ينكر حقو بالتفكير .. ينكر حقو بالتعبير عن اللي براسو .. لك حتى بأنكر حقو بالحياة ! انو الدفاع ما كان من باب ( انا من حقي عيش على ايا اساس عم تنهولي حياتي ) الدفاع كان بطريقة انا ما حكيت هيك شي !! بمعنى انها موافقة في حال ثبات التهمة عليها انو يتنفذ فيها هلعقاب !!!!!! ما بعرف اذا في مصيبة اكبر من هالمصيبة !

لك يا اخي لا تعالجني انو المخلوقة اقترفت ذنب بتستاهل الاعدام عليو .. انو غلطت بحق شخص ؟ غلطت بحق كائن بشري مات من 1400 سنة ؟ انو هلشي بيستاهل اعدام ؟ انو هلشخص معصوم عن الخطأ بحسب بالنسبة الك على عيني وراسي بس لا تجبرني فكر متلك .. انو ما بعرف ليش حاليا عم اكتب بهلشغلة مع انها مانها النقطة الرئيسية اللي عم تخليني قرفان من الوضع .

والأحلى انو باول قائمة ( الأخبار ذات الصلة ) جاية عنوان :



مع انو طز فيو وبجنسيتو الاسرائيلية ( اعتبروها معاداة سامية متل ما بدكن ) وبحكم الوضع السياسي للمنطقة وتعامل العالم مع ملف الاعلام مافي أيا مجال انها كلمة حق يراد بها باطل .. بس لا ننسى انها كلمة حق !

ما بدي كتر حكي بهلموضوع لأنو حاليا انا بحالة اكتئاب مزرية بسبب هلخبر
خايف وانا بهلموجة اكتبلي كام كلمة العن رب العباد فيها يطلعلي كام انتحاري يفجر حالو فيني .. روح فيها دعوسة وفوق المنها ما رح يعترف حدا فيني كانسان رح صير بوقتا عدد متل بقية الاعداد اللي تسقط قطعاً عند مقارنتها بمعاناة بقية الشعوب ...
وبدل ما حدا يكسب فيني ثواب .. احسنلي ابقى هيك كسبان صحتي وعافيتي وعيف كل الحكي اللي فيني جواتي
بس سخافة القدر .. او الحكمة الإلهية .. انو قدر الله يكون المدعو قريشي امام لمسجد اسمو محبة .. اي والنعم والله
انو خيو اعتبرها تنفيسة ولا حدا يعتب علي فيها .. يلعن دين الحالة

الخميس، 22 تموز، 2010

الحمار الطائر



يقلك قبل ايام بجمهورية روسيا الاتحادية ...
قام بعض رجال الاعمال برمي حمار من الطيارة مرتديا باراشوت ... و طلعت الشغلة بالتلفزيون ... و بعدين اجت الشرطة ... و جماعة حقوق الحيوان ... وبلش التحقيق ...

مسكين ابو الفكرة
يا اخي ... واحد صار يملك هليكوبتر خاصة .. و شركات ... و شركة لرياضة الهبوط الباراشوتي... بس ظل يحس بشي لازم يتحقق

شغلة مهمة ... وهي الطلعة بالتلفزيون ... لازم يشبع غريزة الطلعة بالتلفزيون

اما يخلي الصديق المقرب ينتحر و يطلع يبكي بالاعلام ... او يخلي الصحافة تصور صور فاضحة ...
بس الناس ملت من هل قصص

لذلك الجماعة توصلت للفكرة الجهنمية ... فضلت التضحية بالحمار الباراشوتي اضافة للترويج لرياضة الهبوط بالمظلة عن طريق شركتهم الخاصة طبعا ...
و هذا اكيد رح يرضي عقدة الطلعة بالتلفزيون .. و عقدة البحث المتواصل على المال


هذه الاحداث تذكرني .. بالبعض من الناس في عالمنا العربي !

اما يروج لرياضة الجري وراء لقمة العيش او وراء وسائط النقل (مع تغطية الاعلام)

او الترويج لرياضة الهرب من المفخخات

او تصوير بسط احد المواطنين في منطقة غير منطقة السكن ... لترويج الانتماء المحلي !


و تتنوع السيناريوهات في عالمنا الشرق اوسطي الكبير ... باختلاف الاماكن


كل هذه السناريوهات لتسلية المواطنين من الملل الشديد حتى ما يصل مرحلة رجال الاعمال الروس اللي ضحوا بالحمار من شدة الملل !


مصدر الخبر
فديو عن الخبر


الجمعة، 9 تموز، 2010

على هامش المونديال

الجمعة 2 تموز - صباحا

هاني: يا مارق ع الطواحين والميي مقطوعة

سيف : صاير تغني للطواحين ... شنو القصة؟

هاني: اليوم رح تدور الطواحين وتطحن البن البرازيلي و باي باي برازيل

خالد : قصدك البرازيل رح تطحن الطواحين


السبت 3 تموز - 4:00 عصرا

هاني : اليوم رح نسحل الارجنيتين بأربعة مثل ما سحلنا الانكليز

خالد: اليوم رح نكسر المكاين الالمانية على روسكم

سيف : الارجنتين مو انكلترا... خلي ببالك هذا الشي

هاني: انت شلون برشلوني و ماتشجع ميسي و الارجنتين؟

خالد: ميسي و البرشا بالشتا.. المانيا بالصيف هههههه



السبت 3 تموز - منتصف الليل

هاني : الاسبان اليوم ما لعبوا كل طاقتهم

خالد : ماتادور لعب الثيران ... اخ لو البرتغال ساحلتهم ب 2 ... كان الباراوغواي اليوم خسرانين 3- 0

سيف: خالد سحلناكم و اليوم سحلنا البارغواي و بعد ايام رح نسحل المانشافت همين



الاربعاء 7 تموز قبل التاسعة بشوية

هاني: نص ساعة تفصلنا عن ملاقاة هولندا بالنهائي

خالد: اليوم رح تنسحل المانيا ... و نخلص منها

سيف: اييييييييييييي اليوم الماتادور رح يدوس على المانشافت و نتأهل للنهائي



بعد المباراة

سيف : هيييييييييييييييييييييييي ... الماتادور سحق المكائن و غدا سيسحق الطواحين

هاني: احنا خسرنا بشرف

خالد: روح روح العب بعيد احسن لك .. هم خسرانين و هم الك عين تحجي

ييييييييييييييييييييييي مي بارد نزل على كلبي



الخميس 8 تموز

خالد :يا مارق ع الطواحين و الدنيا مكلوبة

سيف : انت البارحة تشجع اسبانبا ؟ اليوم تشجع هولندا ضد اسبانيا؟

خالد: اني شجعت اسبانيا لاني اكره المانيا.. بس أعشق الكرة الشاملة للهولنديين


هامش 1

. الاسماء لاتتشابه باسماء الواقع ... و أي صدفة تشابه معناها الكاتب لم يضبط شغله مئة بالمئة


هامش 2

التواريخ دقيقة لكل مباراة


هاموش 3

هذا الكلام المختصر المفيد من المحادثات ... و رح نترك القارئ يبحر في التفاصيل الثانوية