طب شو مشان؟

تقعد مع واحد بتعرفو منيح, بيبلش يحكي ويحكي ويحكي وياخد مخك, بس وقت بيحكي
بتعرف و متاكد انو هو عم يكذب وما في كلمة من حكيو مزبوطة وكلو خرط بخرط, لا و الاحلى من هيك
انو هو بيعرف انك بتعرف انو هو عم يكذب... مع ذلك بيكمل الحكي... شو مشان؟

بتتعرف على شخص بيلزمك منو شغلة بيلزمو منك شغلة بتقضو هالشغلتين بنفس الشهر بنفس الاسبوع بنفس اليوم
بنفس الساعة بنفس الدقيقة بنفس الثانية ما بيهم, بس بعد ما تخلصو بتتبادلو ارقام
التلفونات, مع ان متاكدين انو ماعاد بدكون شي وبحياتكون مارح تتصلو ببعض
او بالاحرى تشوفو بعض.. لشو تتبادلو الارقام؟

بتروح زيارة لعند جماعة, بيبلشو يحكولك على فلان عم يطالع مصاري ويشتغل,
طب ليش ما تشتغلو, لا نحنا عنا ولاد, طب هو كمان عندو ولاد. لا بس هو
 امو بتنتبه على ولادو, طب وانتي عندك امك تنتبه على ولادك, لا امي
كبيرة بالعمر ما خرج. بعدين هيك هيك ولادو صغار ما عندون مشاكل, نحنا
ولادنا رح يصلو لعمر المراهقة وبدهون انتباه, طب ليش ما اشتغلتو وقت كانو
ولادكون اصغر؟ طج دش دح

يقعد واحد يحكيلك على علان كيف عم يعامل اهلو معاملة ما منيحة, وعالتاني
كيف زابل ولادو, وعالتالت كيف تارك مرتو وعم يحب ويتمعشق, لا والرابع
عم يلعب قمار, بيحكلك على كل اللي بيعرفون, وكل ما بيخلص من واحد
بيخطرلك تقلو, بس انت كمان هيك, وتبلعها... معقول يكون عم يستجحشك؟

واحد بيشتغل بشركة موظف, كل يوم بيروح عالشغل بيحكو جسمو, بدو يعرف
المدير شو بيعمل عالكومبيوتر تبعو, كيف بيراقب الموظفين, كيف بيشوف فيديو
الكاميرات الموزعة بالمبنى, لك بدو يعرف كيف هالمدير باسط سلطتو على هالشركة
 يعني بتجيه الحكّة بشكل مو طبيعي وبجميع انحاء الجسم, بعد فترة بلشت
تخرب هالشركة وتتدهور, بيقوم ابو حكة بيلم اصحابو اللي معاهون نفس الحكة
وبيفتحلون شركة صغيرة, بس شو قال كلّون صايرين مدراء ومديرات وعم يحطو
اعلانات ليدورو على موظفين ومراجعين وزباين.... معقول تكون الحكة سبب انو الكل
بدو يصير مدير؟؟؟

حاج بيكفي لهون صار معي وجع راس عطونا شي حبة, بس لتخفيف وجع الراس, ما لغير شي!