خطوة اولى نحو الاوسكار !

مدونتنا الاولى من نوعها في العالم (الاولى لانها السابقة في جمع اشتراكيين و انبطاحيين و براغي بنفس المدونة) اختيرت كـ موقع الاسبوع على صفحات سورية في مايو 16 2010..

منتشكر صفحات سورية و القائمين عليها كتير لاختيارهم النا كموقع الاسبوع..

يمكن خرج بهالمناسبة نحكي عن بدايات المدونة؟

بالواقع لما فتحناها كانت احدى قعداتنا (انا و التلات شباب) اللي انتبهنا فيها فجأة انو احنا الاربعة (ع اختلافنا بكتير اشيا) بيجمعنا شغلتين :

الي هم الهم المشترك للمواطن العادي , و السخرية !

من هالمنطلق قررنا نجمع كل شي بنفس المطرح :

السخرية

المشاكل اليومية اللي منمر فيها كلنا

شوية افكار و اخبار و اشيا

و احنا الاربعة .

و هيك بلشت قومي طلعي ع الباب..

شوي شوي بلشت الناس تلفي عليها من مناطق مختلفة , و بلشنا نحس انو همنا المشترك هوي مشترك بمعنى الكلمة الحرفي. و انو السخرية ما بتجمعنا لوحدنا.

خاصة بايام متل هلا.. بيدور الواحد فيها دوارة ع شغلة فرايحية تبعد عنو (ولو بقدر صغير) مشاكلو و مسؤولياتو

هاد الاكتشاف كان اول انجازاتنا .

و هلا باختيار المدونة كموقع الاسبوع , بنضيف انجاز جديد ..

ع امل انو نحقق اللي منصبو الو من رسم بسمة ع وجه كل حدا ما قدر يحول ألمو لموضوع سخرية.

____________________

هاموش 1 .. كتبت هذه التدوينة ريتا بينما كانت في فحص اللغة الانكليزية .. لانها قبل ما تروح للفحص شافت اختيار مدونتنا بالموقع .. و بدل ما تتذكر الاجوبة .. اجا ببالها هل تدوينة بخطوطها الرئيسية.

هاموش 2.. كان جورج منهمك جدا جزيلا باختيار قالب جديد .. اجا ياخذ قالب مشابه لموقع مدونات سورية من باب المحبة

هاموش 3 .. اما ابو سارة فقد شرب كاسة شاي بالنعنع مع ام سارة احتفالا بالمناسبة

هاموش 4 .. جبرا كان مارق بالتجربة من قبل وقت اختارو وطن النور و الظلمة ,, فاكتفى باكل صحن كنافة بدون ما يعزم حدا .

هاموش 5 .. ازا ماعرفت شو جاب سيرة الاوسكار فيك تقرا هالتدوينة

هاموش 6.. مصدر الصورة

هاموش 7 .. العمى الهوامش صارو اطول من التدوينة !