فضحنا ( بالضاد) السر وبقينا البحصة ( بالحاء )

ليك يا اخي
ليكي يا اختي
ليك يا بابا سنفور
ليك يا لي ناسي شكل الحنتور

بعد الملحمة الشعرية السابقة ندخل مشابرة ( بالتشبير ) بالموضوع
اذا بدك تنخرط ( بلا معنى ) بعالم الأنترنت المدعوم باللغة العربية بشكل عملي و بدك تفهمه بشكل صحيح لازم تكون عايش بالحياة الواقعية وبيكفي انه مارر عليك قبل هلمرة تسمية "حا يا الله قطعة بعشرة" حتى تصير خبير بادارة مواقع الانترنت
لك اي اي بعشره وأوقات ممكن يراعيك/ي الزلمة

حط ببالك أنه اللي بفوت على مدونتك - موقعك - زاويتك - امتداد اناملك - زريبتك .. الخ من التسميات الخاصة فيك والمنتهية بجذر البرغشة والـ " بك "بكون تماما متل الزبون اللي فايت على محل حا يا الله قطعة بعشرة
بفوت على المحل مع أنه 100% ما بيعرف شو هية البضاعة اللي جوا وما بيعرف اذا كان بهمه الشي الموجود فيها او لا
العنوان هوي اللي جذبه أو هوي اللي خلاه يجرب يفوت
بجوز الزلمة معه 10 ليرات وحابب يتبحتر على حاله فيها
بجوز لازمه شي شغلة ومتمني يطلع حقها عشر ليرات مشان ينبسط على حاله انه جاب شي عظيم بسعر نص ربطة خبز
المهم خليك عم تفكر بالعنوان أكتر من التفكير بالموضون
عم احكي معك بالوجدان والضمير
نص الأوقات العالم ما بتهتم بالموضمون بس بتهتم بالعنوان

وفي ذلك الصدد نورد إليكم احدث الاقتراحات التي جمعها مراسلنا في بلاد ما بين الجبلين على يسار الواديين في مفترق القارورتين وقام تلخيصها بـ :

اول شي بعّد بمقدار سبع شبار ونص عن العناوين الطويلة
بتعرف انت المواطن هلأيام وقته حقه مصاري ومو فاضي يقرا العناوين الطويلة
بجوز مع الأيام يجي يطالبك بدفع حق الساعات اللي قضاها وهوي عم يقرا العناوين عندك
هداك الوقت ورجيني حالك من وين رح تلحق تدفع للناس وتسكّت هاد وتخرس هداك
بشرفي رح يشرشحوك شرشحة اخت اختا

المهم
بعد ما نصحتك تبعد عن العناوين الطويلة رح انصحك نصيحة تانية واللي هوي انك تختار العناوين المثيرة
لك مو السيكسية
العمش شو انك طشم وفكرك ما بفكر غير بالجنس
يا اخي مثيرة يعني جذابة يعني مميزة
وحط ببالك قاعدة التابوهات الثلاث ( السياسة - الجنس - الدين )
هدول التلاتة متل قتالات البق والبرغش
بتلاقي الشعب عرفان انه العلقة فين وخيمة ومع هلشي بينجذب بشكل لا ارادي الن وما بيعرف يتعامل الا بمحيطن

واذا بتقدر تجمع بين هلتابوهات التلاتة بعنوان واحد
يا لطيف يا لطيف
اي مو بس بصير عندك 3 تابوهات
بصير عندك مقبرة كاملة ولحق على دفن موتى يا معلم ( بالمناسبة دفن الموتى مصلحة مربحة كتير على ذمة واحد صاحبي حفار قبور وطقيق براغي اللي بحبو قلبك )
يعني ولنفرض مثلا مثلا يعني من باب المثال عم نفرض انك سميت تدوينة بـ
اغتصاب سماوي للأحزاب العلمانية

بتلاقي الشعب كفت فوق بعضه
بعدلي هيك بدي فوت قبل المنك
يا حقير لا اتدفش انا جاي قبلك

فاذا ما كنت مزبط قصص الباندويث لصفحتك وحاسب حساب العجقة لا تدخل هيك دخلة مشان ما تتبهدل

وين كنا ؟
اي على اليمين معلم يعطيك العافية
عيف بقية الحساب على الله