"انفلونزا الماعز ؟؟؟ حدا سمع فيها .... شبيبة بلا ماتاكلو لحمة .. لأنو ما ضل شي باللحمة الا وتنفلوز بشي انفلو ... حولو عالخضرة أحسن ..... بس بلكي بكرا اخترعولنا شي أكبر .. متل انفلونزا البندورة مثلا أو انفلونزا الخيار والفليفلة .... اللـــه عليك يا زمن"
هذا ما ورد حرفيا ع الفيس بوك .. ع لسان .. (او ع كي بورد ما بتفرق) احد الاصدقاء..
اي علّي الطربوش (او الطرباش حسب رواية اخرى ) انو توعيتنا من هالامراض دليل جديد ع انو حكوماتنا بتخاف علينا,,
بدليل انها بتطلع كل انواع الامراض العجيبة بالدنيا .. اللي سمعنا فيها و الي ما سمعنا حتى سمعونا .. واللي ما حدا سمع او رح فيها غيرنا... خصوصي وقت الشتا ..(انفلونزا ... انفلونزا ... الخ الخ :) )
ايعني ايام البرد, وقلة الحركة و التجمد خلف الصوبا و التصفن الداخلي (سمايلي ذكي)
كنت عم اتخيل بالامراض اللي رح نطلّع عليها بكرة
اليستة جديدة ررح تكون شي قريب عن التالي :
1- هستيريا سمك
2- جرب غزلان
3- جنون بالخيار
4- تلبك امعاء بالباتنجان
و هلم جرا...
بحديثي عن الشتا و التصفن الداخلي والامراض .. وكل الاشيا مدري كيف بتنربط بدماغي
المهم.. تزكرت القاتل السفاح "ابو شاكوش" اللي كانو يشتغل شغلو ايام الشتا بسلاسل قتل
و كل يوم يطلع بجريدة .. ما بعرف ازا المفروض ازكر اسمها ع الهوا او لا :D
عناوين على الشكل التالي .. الجريمة الاولى لـ ابو شكوش
الجريمة التانية لابو شكاوش
الجريمة العاشرة و نصف لـ ابو شاكوش....
و هيـــــــــك بتمر الشتوية و المواطن عم يفكر بالسفاح ابو شاكوش و امنو الشخصي
بينسى سعر الكاز.. و بينسى حق كيلو البندورة
و بينسى الدوائر الحكومية و معاملاتها المريخية
و بينسى الاقساط الجامعية الخرافية
و بينسى اسمو و عنوان بيتو
و بيفكر بامنو الشخصي و بالسفاح ابو شاكوش
هلا هاد الحكي كان ايام زمان.. وقت كانت الناس تفكر بامنها الشخصي..
ولكن مع مرور الوقتو تحول الناس الى انتحاريين في سبيل الموت الغامض :P
قررنا انو نكشف عن بعض الامراض .. لانو المجرمين ما عادو ... خلينا نقول عـ "الهوت ليست" بالاشيا الي بتجدب المواطن للجريدة
هون بحب نوه كمان .. كيف الصحافة و من يقودها بيدورو ع امتاع المواطن الزهقان ... ايــــــــــه
منرجع لـ ليستة امراضنا و الاوبئة الحيوانية _قريبا نباتية_ لانو قربو يخلصو الحيوانات يعني :
هيك بيصير المواطن شغلتو -بالشتوية خصوصي- يفكر بصحتو لانو "الانسان اغلى ما نملك" اي نعم ..
بيقضي وقتو بالحذر من الحيوان الفلاني .. و تجنب الفاكهة العلتانية
بالنهاية منكتشف انو ما ضل النا غير رفيقنا الهوا
فـ كول هوا اخي المواطن.. و دمت بصحة و سلامة ع طول الدرب
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.