الاثنين، ٦ كانون الأول ٢٠١٠

شوية ردات فعل على خبر .. كفريات وسبسبات وما شابه ذلك



اليوم فقت من الصبح وانا عم اعمل فتلتي المعتادة على مواقع النت تفشكلت بخبر فشكلي كل يومي .. وعلأغلب كل اسبوعي

الخبر بقول :
http://www.farfesh.com/Display.asp?catID=119&mainCatID=117&sID=91504
مكافأة بآلاف الدولارات.. لمن يقتل المسيحية التي اساءت الاسلام!
بعد ادانة المرأة المسيحية اسيا بيبي التي تلفظت بألفاظ تنال من الرسول محمد صلى الله عليه وسلم، وبعد ان حكمت المحكمة عليها بالاعدام، فقد اعلن رجل دين باكستاني مسلم عن مكافأة مالية تقدر بآلاف الدولارات لكل من يتجرأ على قتل تلك المرأة الباكستانية المسيحية.
وذكرت تقارير إخبارية أن مولانا يوسف قريشي إمام مسجد محبة خان في بيشاور عاصمة إقليم خيبر بختون خوا الذي يعصف به التمرد شمال غربي البلاد، أعلن عن المكافأة خلال مسيرة احتجاجية يوم الجمعة.
ونقلت صحيفة "ديلي تايمز"عن قريشي قوله: "سأقدم 500 ألف روبيه (5890 دولارا) لمن يقتل آسيا بيبي" كما دعا طالبان أيضا الى قتل المرأة، لأن في ذلك "خدمة للدين". كانت محكمة "نانكانه صاحب" الجزئية في وسط إقليم البنجاب، أدانت بيبي الشهر الماضي، بعد مرور سبعة عشر شهرا من إلقاء القبض عليها بتهمة التطاول على الدين.

وأنكرت بيبي الاتهام، قائلة إنها اتهمت زورا بعد مشادة مع مجموعة من النساء المسلمات حول وعاء ماء. غير أن المحكمة قضت بإعدامها.


ولأنو الفشكلة صعبة بهلأيام بقيت كل نهاري عم فكر بمضمون الخبر وبحالة الشخص المعني فيو
ومن جحشنتي ( اي نعم جحشنتي ) اني فتحت هلسيرة بالجامعة مع مجموعة من الشباب المتدينين
ما كان هدفي محاججة فكرية او مناطحة دينية
كان مجرد حكي عن الشي اللي مأثر فيني بهليوم
فنط ( وكلمة النط هون بتجي بمفهوم معنوي وفعلي على نمط انبرى ) شب ليحكيلي على أطفال غزة ومعاناة أهل العراق
انو وين هوي السقف للنقاش اللي ممكن يدور بين 2 طرشان

يا اخي بالنسبة الي المهزلة بالخبر والجزء الجارح جدا فيو هوي انو الفكر الاستبدادي اللي ما بيحترم حقوق العالم ولا بيعترف ألا باتجاه واحد للحقوق .. هوي الاتجاه اللي بفوت من تحتك وبيطلع من راسك ( الخازوق في حال حدا ما دارتلو ) .. بس الاتجاه التاني للحقوق اللي بيطلع من راسك من افكار وحكي ما بيعترفلك فيو وبعتبرو جريمة
المصيبة بهلطريقة البتقرف بالتعامل انو استمراريتها بتخلي الشخص ينكر حقو بكلشي.. ينكر حقو بالتفكير .. ينكر حقو بالتعبير عن اللي براسو .. لك حتى بأنكر حقو بالحياة ! انو الدفاع ما كان من باب ( انا من حقي عيش على ايا اساس عم تنهولي حياتي ) الدفاع كان بطريقة انا ما حكيت هيك شي !! بمعنى انها موافقة في حال ثبات التهمة عليها انو يتنفذ فيها هلعقاب !!!!!! ما بعرف اذا في مصيبة اكبر من هالمصيبة !

لك يا اخي لا تعالجني انو المخلوقة اقترفت ذنب بتستاهل الاعدام عليو .. انو غلطت بحق شخص ؟ غلطت بحق كائن بشري مات من 1400 سنة ؟ انو هلشي بيستاهل اعدام ؟ انو هلشخص معصوم عن الخطأ بحسب بالنسبة الك على عيني وراسي بس لا تجبرني فكر متلك .. انو ما بعرف ليش حاليا عم اكتب بهلشغلة مع انها مانها النقطة الرئيسية اللي عم تخليني قرفان من الوضع .

والأحلى انو باول قائمة ( الأخبار ذات الصلة ) جاية عنوان :



مع انو طز فيو وبجنسيتو الاسرائيلية ( اعتبروها معاداة سامية متل ما بدكن ) وبحكم الوضع السياسي للمنطقة وتعامل العالم مع ملف الاعلام مافي أيا مجال انها كلمة حق يراد بها باطل .. بس لا ننسى انها كلمة حق !

ما بدي كتر حكي بهلموضوع لأنو حاليا انا بحالة اكتئاب مزرية بسبب هلخبر
خايف وانا بهلموجة اكتبلي كام كلمة العن رب العباد فيها يطلعلي كام انتحاري يفجر حالو فيني .. روح فيها دعوسة وفوق المنها ما رح يعترف حدا فيني كانسان رح صير بوقتا عدد متل بقية الاعداد اللي تسقط قطعاً عند مقارنتها بمعاناة بقية الشعوب ...
وبدل ما حدا يكسب فيني ثواب .. احسنلي ابقى هيك كسبان صحتي وعافيتي وعيف كل الحكي اللي فيني جواتي
بس سخافة القدر .. او الحكمة الإلهية .. انو قدر الله يكون المدعو قريشي امام لمسجد اسمو محبة .. اي والنعم والله
انو خيو اعتبرها تنفيسة ولا حدا يعتب علي فيها .. يلعن دين الحالة

هناك ٩ تعليقات:

  1. شريك مع اني ضد هالتعصب الزائد , بس اذا بتشوف الموضوع من وجهه نظر تانيه, يعني المخلوقه عايشه بمحيط معين بيفرض نوع معين من الحدود ولازم تلتزم فيها, ما حدا اجا من الباب للطاقه وقال بدو يقتلها , هيه طلعت عن الاعراف الموجوده هنيك وهاد الوضع الطبيعي عندهون , يعني اذا انا عايش ببولندا مثلا وفتت عالكنيسه وكسيت اخت شرف عيسى ! شو رده الفعل حتكون برأيك ! انا بأكدلك انو المسيحين كمان حيتعاملو معي بعنف. وبين قوسين يا الطائفيه هيه انك تجمع الناس ببوتقه وحده على حسب دينهون , متل الخبر يلي حاطو جوات الخبر
    عالعموم بتمنى ما تكون سبب "الحمقه تبعك" نابع من انها مسيحيه وبالتالي الطائفيه العميه يلي عم تسبها هي يلي عم تحركك  

    ردحذف
  2. عفوا , قصدي سبيت او غلطت على عيسى , يا ريت تعدل المشاركه يلي قبل
    بعتذر منك

    ردحذف
  3. طول عمرهن النسوان بيتقاتلوا على المي وعلى غيرها والمسبات بيناتهن شي عادي، بس صدف بهالحالة إنو في واحدة ديانتها مختلفة، إذاً صار بدها ياغيرة الدين.
    إنو يطالبوا بإعدامها في الباكستان بعتقد إنو شي عادي بيتناسب مع المجتمع، ولكن أنو حدا من عنا يأيد هيك طلب همجي لازمها مية سؤال واكتئاب. طول عمرنا ونحن منسمع مسبات على الله والرسول من رجال مسلمين ومتعصبين حتى للدين وما سمعنا مرة حدا طلب بمعاقبتهم فمابالك بإعدامهم!

    ردحذف
  4. أحترم فيك هذا الحسّ الإنساني الذي أصبح عدماً في وقتنا الحاضر، وأحترم فيك قلقك على روح من خلق الله قرر بعض المجرمين أن يحددوا ساعة موتها ظلماً وبهتاناً.

    لو فرضنا يا عزيزي المدوّن أن هذه البيبي آسيا قد شتمت محمد، فهل تستحق القتل؟ أم أنّ محمداً أصبح إلهاً ولا يجوز لأحد المساس بألوهيته؟

    اسمح لي أن اعبّر عن حالة الغثيان التي أصابتني عند قرائتي للخبر أيضاً في أحد المواقع الالكترونية، يا أيها الذين آمنوا بمحمد، اتركوا النّاس (بحالها) وبمعتقداتها وبإيمانها، فرسولكم الكريم ذو الخلق العظيم يتربّع الآن في جنة الحوريات وأنهار الخمور كما يؤمنون، فارحموا هذه البيبي وارحموا الإنسانيّة وارحمونا... يرحمكم الله.

    لك احترامي،

    وسيم حدّاد - مدوّنة الغربال

    ردحذف
  5. @مارق بالصدفة
    المشكلة يا صديقي انو انت اللي شفتو من الخبر هوي كلمة ( مسيحية ) ونسيت كل بقية الحكي
    وبيني وبينك انا وقت كنت عم انقل توقعت يصير مجال للحديث بهلنقطة بس عفتها من باب الامانة
    انا بالنسبة الي محور تبع كيف الانسان بيستنكر حقو بالحياة زلزلني وخلاني فوت بمليون حيط .. بالنسبة الك لو ما كان في كلمة ( مسيحية ) بالخبر ما كنت كتبت الكومنت او بالاحرى ما كان في نقطة لتحكي عليها كون الكومنت ما بيحكي الا بهلنقطة اليتيمة .. لهيك بعتقد انو البعد الطائفي هوي اللي انت فضلت تاخدو بالخبر وتنسى بقية الابعاد .

    بخصوص مثالك ما بعرف اذا كان موقع عيسى في المسيحية ( كلمة الله اللي اختارت التجسد ) يشابه موقع محمد في الإسلام وبصراحة ما كتير بهمني الفرق ... انو في باب لباقة وفي باب احترام وفي كتير بواب للتعبير لازم تتاخد بعين الاعتبار ما بيستاهل ولا واحد منها الاعدام !
    انو منظمات حقوق الانسان بالعالم عم تلغي مبدأ العقاب القاتل بمعنى آخر الانتقام من المجرم عن طريق قتلو وعم تفتح باب الإصلاح كمفهوم جديد بدال الانتقام .. ونحن شوف وين عم نحكي بايا ( جرم ) عم تنناقش .

    بخصوص التعديل مافي الو داعي شرف عيسى ما انا اللي بدافع عنو او انا اللي بحميو بكل الاحوال لا تعتبر العصاية طريقة مثالية لفرض الاحترام .. الخيار بيرجعلك

    ويا هلا فيك

    ردحذف
  6. @فاطمة

    ما تم المطالبة باعدامها لا
    تم الحكم عليها بالاعدام
    بس امام المحبة ما اقتنع بالفكرة وطالب برأسها
    يمكن لو عندي فكرة مطولة على واقع باكستان ما تأثرت بهيك خبر باعتبارها قمة بحرية التعبير وقمة بالاحترام
    من مبارح لليوم وانا على النت عم اقرا بشو صاير احداث غريبة عجيبة وشو نوع الاحكام اللي صايرة بالمنطقة

    يمكن الخبر هاد ما بيطلع برات السياق العام
    بس بيفضح معاناة لا يمكن حلها
    انو المعونات الانسانية فيها تقضي على المجاعة بافريقيا
    هدول شو ممكن ينعمل معن لينفتح تفكيرن شوي ويتحضرو ؟

    ردحذف
  7. @غربال

    أتفق معك في معظم ما ذكرت
    لكن القدرة على استيعاب منهجية التفكير هذه باتت خارج نطاق قدراتي .

    يُقال أن الفطرة البشرية تعمل بالصواب وتنبذ المخالف لحسها ومشاعرها . أي أن تمدن الانسان والعيش ضمن مجتمع يحضنه يعتبر عامل كافي لمعرفته القيم المجيدة من المساعدة .. المودة .. الاهتمام بالآخر .. العطاء المجاني .. الضمير الحي .. وحتى الشرف !

    أعتقد اننا الآن على هامش خبر اناس فقدوا هذه القدرة على الاختيار والحكم
    فقدوا انسانيتهم وفقدوا احترامهم لها

    ردحذف
  8. بعيد عن السابق، ليش المدونة مو موجودة بكوكب سوريا؟

    ردحذف
  9. بصراحة ما بعرف على علمي موجودة
    هلق منزبطها حجة امنيّة طلباتك اوامر

    ردحذف

ملحوظة: يمكن لأعضاء المدونة فقط إرسال تعليق.