حتى بالفلاش ميموري !

اشتريت البارحة ذاكرة رقمية ( فلاش ميموري) ، عند استعراضي المنتجات لاحظت وجود نموذجين بنفس الشكل وسعة الذاكرة ومع ذلك كانا يختلفان بالسعر فالأول يزيد عن الثاني بمبلغ 400 ليرة ! توقعت أن الاختلاف ناتج عن اختلاف هوية بلد المنتج او شيء من هذا القبيل ، لكنني استغربت عندما علمت أن الفرق الوحيد يعود إلى كون المنتج صاحب السعر الأغلى مكفول مدى الحياة
حاج حكي بالفصحى تعبت من الفصحنة خلني فش خلقي بالعامية
انه شو متوقع صاحب المحل بدّي أعمل بالكفالة تبع مدى الحياة ؟ بدي ورّت الفلاش ميموري لأحفادي ؟
أو متوقع منّي عيش لنهاية الدهر ؟ او انه شكلي جاي من جبل الأوليب مع عند اخوتي الآلهة ؟
يا اخي انا بجوز هلتكة اطلع من باب المحل يجيني الباص العجيب اللي عم يسوقه زلمة طفران ومتوكل على الله بهلدنيا ليعملني عجينة تحت دواليبه .. شو بيطلع منها كفالتك ؟
وبجوز تكون الشركة عندها ضمير حي ما بترضى تصنع فلاشات ممكن انها تتعطل بس لأن الزلمة المنيح دائما بكون متخوزق نزلت فكرة الكفالة لتنهب الشعب الكادح مع أنه فلاشاتها لا بتتعطل ولا بتصيبها شي
لك وينك
بجوز انت كبياع قاعد عم تكش الدبان اللي بوجك شفتني جاي وعامل سكسوكة قلت لحالك هاد شب ظريف لطيف أليف ممكن نخورفه ونبلفه بـ 400 ليرة ونطالعه من المحل عبماعي ويقاقي ما يلاقي !
اي 400 بالجيب أحسن من عشرين فلاش ميموري علشجرة
ويا سيدي ما بدي هلكفالة ولا بدي هلحياة كمان ( لاحظ كيف سودتلي عيشتي )
طلاع من حياتي وراسي وتاريخي .. وسكر الباب وراك